أمـــــي وحـشـتـيـنـي

كان كل همه إنها متشوفش الكيس اللي في إيده .. قالها من عالباب تغمض عينيها .. غمضت و فتحت الباب .. دخل جري على أوضته .. ضحكته افترشت السجاد من باب الشقة لحد أوضته .. بقاله اسبوعين بيحوش عشان يجيبلها هدية في عيد الأم .. أخيرا جاء العيد , أخيرا هيوريها الهدية .. الله
بعد الغدا يا ماما
اتغدينا .. و دخل جري على أوضته .. ضحكته افترشت السجاد من السفرة لحد أوضته .. جاب الهديه .. كيس صغير مشبوك فيه كارت .. الكارت برضه صغير .. زي إيديه .. زي عينيه .. جرى على أوضتها .. ضحكته افترشت السجاد من أوضته لحد أوضتها .. لحقها قبل ما تنام .. مكنتش هتنام يا عمرو .. هي عارفة إنك جبتلها هدية .. و إنك مش هتقدر تستنى لحد ما تصحى .. حط إيديه على عينيها .. حاسس برموشها بتتحرك , عايزة تفتح عينيها .. عايزة تعرف الهدية .. الله
ساب الهدية على رجلها و طلع يجري .. كان نفسه يجيبلها الدنيا كلها .. بس مصروفه قليل .. و الهدية صغيرة .. زي إيديه .. زي عينيه .. و ماما حاجة كبيرة .. الهدية مش مناسبة .. الهدية أقل من ماما .. الله
لكن ماما فرحت بيها .. فرحت بيها قوي .. ناديت عليه .. جه من أوضته جري .. ضحكته لم تفترش السجاد .. ضحكتها فعلت. الله

No comments: